ကမ္ဘာလုံးဘုရား

တနင်္သာရီတိုင်းဒေသကြီး မြိတ်မြို့နယ် စန္ဒဝတ်ကျေးရွာရှိ တစ်ကမ္ဘာလုံး အေးမြချမ်းသာဘုရားကြီးတွင် ကမ္ဘာကြီး​အေးမြချမ်းသာစေရန် ရည်ရွယ်ချက်ဖြင့် ကမ္ဘာ့အကြီးဆုံး နှီးဘုရားကြီး နှင့် ခေမရဌမာရိတ်​စေတီ​တော် တည်ထားပူဇော်ရန် ကမ္ဘာလုံးကျောင်းတိုက်ဆရာတော် ဦးဆောင်၍ သာသနာပြု လုပ်ငန်းများ ဆောင်ရွက်လျက် ရှိသည်။
နှီးဘုရားကြီးနှင့် ခေမရဌ မာရိတ်​စေတီ​တော် တည်ထားပူဇော်မည့် တစ်ကမ္ဘာလုံး အေးမြချမ်းသာဘုရား ကြီးကို စန္ဒဝတ်ကျေးရွာ မြိတ်-ကျွဲကူး ကားလမ်းမ ဝဲဘက် ရွှေနန်းတောင်ကုန်းတော်ပေါ်၌ (၂၀၁၆) ခုနှစ်တွင် စတင်၍ သာသနာ့တက္ကသီလဓမ္မစရိယ ဘဒ္ဒန္တ ခေမာစာရ ကမ္ဘာလုံးကျောင်းတိုက် သာသနာပြု ဆရာတော် ဦးဆောင်၍ စေတနာရှင် အလှူရှင်များနှင့် တပည့်ဒါယိကာ၊ ဒါယိကာမများဖြင့် တည်ဆောက်ရေး လုပ်ငန်းများကို ဆောင်ရွက်လျက်ရှိသည်။
“တစ်ကမ္ဘာလုံး အေးမြချမ်းသာပါစေလို့ ရည်ရွယ်ချက်နဲ့ ဘုရားကြီးကို တည်ထားကိုးကွယ်တာဖြစ်ပါ တယ်။ နှီးဘုရားကြီးပူဇော်မယ့် ဂန္ဓကုဋိ ခေမရဌမာရိတ်​စေတီ​တော်က (၁၀၈)ပေမြင့်ပြီး အရန်စေတီ (၁၀၈)ဆူ တည်ထား ကိုးကွယ်ထားပါတယ်။ နှီးဘုရားစေတီကြီး အောက်ဘက်ပိုင်းကို ပုဂံခေတ်ဟန်နဲ့ အပေါ်ပိုင်းကို ပျူခေတ်ဟန် ခေတ်နှစ်ခေတ်ပူးပေါင်းပြီးတော့ တည်ထားကိုးကွယ်တာဖြစ်ပါတယ် ” ဟု သာသနာ့တက္ကသီလ ဓမ္မစရိယ ဘဒ္ဒန္တ ခေမာစာရ ကမ္ဘာလုံးကျောင်းတိုက် သာသနာပြုဆရာတော်က မိန့်ကြားသည်။
တစ်ကမ္ဘာလုံးအေးမြချမ်းသာဘုရားကြီးဝတ္တကမြေတွင် တည်ထားပြီးစီးသည့် ဉာဏ်တော်(၁၈)ပေ ကမ္ဘာ လုံးစေတီတော်၊ ဉာဏ်တော်(၂၇)ပေ ရပ်တော်မူဘုရား၊ ရန်အောင်မြင် အောင်သိဒ္ဓိကပ်ကျော် ဘုရားစေတီတို့ကို ဖူးတွေ့ပူဇော်ရပြီး သာသနိကအဆောက်အဦအဖြစ် ကမ္ဘာလုံးကျောင်းတိုက်၊ ကမ္ဘာလုံး သမုတ်သိမ်တော်၊ ဓမ္မာရုံ ၊ ဆွမ်းစားကျောင်းဆောင်တို့ကို တွေ့မြင်ရပါသည်။
ထို့အတူ နှီးဘုရားကြီး ထားရှိပူဇော်မည့် (၁၀၈)ပေအမြင့်ရှိ ခေမရဌ မာရိတ်​စေတီ​တော်နှင့် (၉)ပေ အမြင့်ရှိ အရန်စေတီ(၁၀၈)ဆူ၊ (၃၆)ပေအမြင့်ရှိ နဂါးကိုးကောင် နဂါးရုံဘုရား၊ အရဟံသိဒ္ဓိစေတီတော် တည်ဆောက်ရေး လုပ်ငန်း ဆောင်ရွက်နေသည်ကို ဖူးမြင်ရပြီး သာသနိကအဆောက်အဦအဖြစ် (၂၄)ပေအကျယ် တစ်ပါးနေ ကမ္ဘာလုံး ကျောင်းဆောင် (၂၄) ဆောင်၊ အကျယ်(၂၀၀)ပေ၊ အမြင့်(၁၀၀) ပေရှိ ကမ္ဘာ့ဧကရာဇာ ဓမ္မဗိမာန်တော်ကြီး တည်ဆောက်လျက်ရှိသည်ကို တွေ့မြင်ရပါသည်။
“နှီးဘုရားကြီးကတော့ ဉာဏ်တော်အမြင့်(၃၂)ပေ ၊ နှီးဘုရားယက်လုပ်တဲ့နေရာကတော့ အောင်ပန်းမြို့ မှာ ယက်လုပ်နေပါတယ်။ နှီးဘုရားကြီးရဲ့မုဒြာက ပြည်​တော်ဝင်ဟန် ခြေဆွဲထိုင်မုဒြာဖြစ်ပါတယ်။ နှီးဘုရားကြီးကို (၂၀၁၇)ခုနှစ်မှာ စတင်ယက်လုပ်ခဲ့ပြီး (၂၀၂၁)ခုနှစ် နှစ်ကုန်ပိုင်းမှာ ပြီးမယ်လို့ ခန့်မှန်းရပါတယ်။ နှီးဘုရားကြီးက မြန်မာမှုလက်ရာဖြစ်တယ်။ မြန်မာမှုတွေကိုလည်း သိစေချင်တဲ့ သဘောနဲ့ တည်ထားကိုးကွယ်တာပါ။ ပြီးတော့ မြိတ်မှာလည်း နှီးဘုရားမရှိတဲ့အတွက်ကြောင့် တည်ထားကိုးကွယ်တာပါ”ဟု ကမ္ဘာလုံးကျောင်းတိုက် သာသနာပြု ဆရာတော်က ထပ်မံမိန့်ကြားသည်။
တစ်ကမ္ဘာလုံးအေးမြချမ်းသာဘုရားကြီးတွင် သာသနာပြုလုပ်ငန်းများအဖြစ် (၂၀၁၆)ခုနှစ်၌ ရပ်​တော်မူ ဘုရား၊ ကမ္ဘာလုံးသမုတ်သိမ်တော်၊ ပေ(၇၀)ရေကန်၊ သာသနာ့အလံတော်ကြီး(၆)တိုင်နှင့် အလံငယ် (၁၀၈)တိုင် စိုက်ထူတည်​ဆောက်ပြီးစီးခဲ့ကြောင်း၊ (၂၀၁၇)ခုနှစ်၌ ကမ္ဘာ့အကြီးဆုံး နှီးဘုရားကြီး စတင်ယက်လုပ်ခြင်း၊ နှီးဘုရား ​ဂန္ဓကုဋိ စေတီ​တော်တည်​ဆောက်ခြင်း၊ ဓမ္မာရုံအငယ်တည်​ဆောက်ခြင်း၊ ရပ်​တော်မူဘုရား​မြေထိန်းနံရံ၊ ​ရေပန်း၊​ နဂါး​နှစ်​ကောင် ​ရေတံခွန်၊ ရန်အောင်မြင် အောင်သိဒ္ဓိ ကပ်ကျော် ဘုရားစေတီ၊ ကမ္ဘာလုံး​စေတီ​ အာရုံခံ​ကျောင်း​ဆောင်နှင့် ရင်ပြင်လက်ရန်းများ တည်ဆောက်ပြီးစီး ခဲ့ကြောင်း ကမ္ဘာလုံးကျောင်းတိုက် သာသနာပြု ဆရာတော် ထံမှ သိရသည်။
ထို့အတူ (၂၀၁၈)ခုနှစ်၌ နဂါးထမ်း​မောင်းကြီးနှစ်လုံး ၊ ကမ္ဘာလုံး​တစ်ပါး​နေ​ကျောင်း​​ဆောင်များ၊ ကမ္ဘာလုံး ​စေတီ​တော် ရင်ပြင်​တော်ခင်းခြင်း၊ ဆွမ်းစား​ကျောင်းဆောင်၊ စေတီတော်အဝင် (၂၅)​ပေအကျယ် ပေ(၁၀၀၀​)ကျော် ကွန်ကရစ်လမ်း၊ သစ်သီးဥယျာဉ်တည်ဆောက်ခြင်း၊ (၂၀၁၉)ခုနှစ်၌ ကမ္ဘာ့ဧကရာဇာ ဓမ္မဗိမာန်​တော်စတင်တည်​ဆောက်ခြင်း၊ အရံစေတီ​တော် (၁၀၈)ဆူ စတင်တည်​ဆောက်ခြင်း၊ နှီးဘုရား​မြေထိန်း​ကျောက်တန်းနံရံများ တည်​ဆောက်ခြင်းနှင့် (၂၀၂၀)ခုနှစ်၌ ဂန္ဓကုဋီ​စေတီ​တော်အကြမ်းထည် အပြီးတည်ဆောက်ခြင်း၊ အရံ​စေတီ​တော်(၁၀၈) ဆူ အကြမ်းထည်တည်​ဆောက်ခြင်း၊ အရဟံသိဒ္ဓိ စေတီတော် တည်ဆောက်ခြင်း စသည့် သာသနာပြုလုပ်ငန်းများ ကို ဆောင်ရွက်ခဲ့ကြောင်း သိရသည်။

ကမ္ဘာ့အကြီးဆုံးနှီးဘုရားကြီးနှင့် ခေမရဌမာရိတ်​စေတီ​တော် တည်ထားပူဇော်ရန် ကမ္ဘာလုံး ကျောင်းတိုက် ဆရာတော် ဦးဆောင်၍ စေတနာရှင် အလှူရှင်များနှင့် ဒါယကာ၊ ဒါယိကာများဖြင့် တည်ဆောက်ရေးလုပ်ငန်းများကို ဆောင်ရွက်လျက်ရှိသည့် တစ်ကမ္ဘာလုံး အေးမြချမ်းသာဘုရားကြီးသို့ သဒ္ဒါတရားပွားများ ကုသိုလ်ပြု ပါဝင် လှူဒါန်းနိုင်ကြစေရန်နှင့် လာရောက် ဖူးမျှော်ကြည်ညို နိုင်ကြစေရန် ရေးသားဖိတ်ခေါ်လိုက်ပါသည်။

ခိုင်ထူး